Për të dytën ditë me radhë në vendin tonë janë shënuar 4 viktima nga koronavirusi në harkun kohor të 24 orëve të fundit. Ndërsa nga 420 testime, janë konfirmuar 83 raste pozitive. Në 24 orët e fundit, nuk e kanë fituar dot betejën me sëmundjen 4 qytetarë: dy prej tyre 57-vjeçare nga Shkodra dhe Dibra, një pacient 75 vjeçar nga Durrësi dhe një paciente 81 vjeçare nga Tirana. Ministria e Shëndetësisë e konsideron serioze situatën, ndërsa apelon që të mos ketë asnjë tolerancë për protokollet e sigurisë. Situata e COVID19 në vendin tonë vijon të jetë serioze ndaj, edhe një herë, Ministria e Shëndetësisë dhe Mbrojtjes Sociale i drejtohet të gjithë qytetarëve dhe bizneseve të jenë të kujdesshëm në zbatimin e protokolleve të sigurisë. Respektimi i distancës, vendosja e maskës, higjiena vetjake dhe kolektive janë mënyrat e vetme për të frenuar përhapjen e COVID19. Në spitalin infektiv ka të shtruar, por edhe pacientë në terapi intensive. Aktualisht janë të shtruar 72 pacientë në spital, 8 pacientë janë në terapi intensive në gjendje serioze dhe 4 prej tyre janë të intubuar në gjendje të rënde.