Policia spanjolle tha të premten se kishte sekuestruar katër ton kokainë të fshehur në thasë me oriz në portin e Barcelonës, duke shkatërruar edhe një rrjet kriminal që vepronte në Spanjë, Paraguaj dhe Britaninë e madhe. Trafikantët e kishin përpunuar drogën duke e kthyer në pluhur në Asuncion, në Paraguaj, dhe më pas e kishin futur në qese plastike që i kishin fshehur brenda thasëve me oriz, të qepur me dorë, përpara se t'i nisnin për në Evropë, thuhet në deklaratë. Kontejnerët mbërritën në portin e Barcelonës në fillim të këtij viti, por ngarkesa e kokainës u zbulua vetëm në korrik kur kontrabandistët i zhvendosën kontejnerët, tha policia. Autoritetet në Paraguaj dhe Britani sekuestruan pesë ton të tjerë kokainë të kontrabanduar nga e njëjta organizatë kriminale në dy operacione të ndryshme muajt e fundit. Tre ton kokainë u kapën në Paraguaj përpara se droga të mund të dërgohej në Belgjikë në tetor 2023, ndërsa në mars policia britanike sekuestroi dy ton kokainë në portin e Southamptonit që kishin si destinacion një kompani spanjolle nën hetim, me qendër në Toledo. Policia arrestoi tetë persona në Spanjë, ndërsa dy persona u arrestuan në Paraguaj, thuhet në deklaratë.