Kosova shënjon 26 vjetorin e një prej masakrave më të përgjakshme, që u bënë pikë kthese në historinë e saj, atë të Reçakut, ku më 15 janar 1999, 45 civilë të pafajshëm, fëmijë, gra, burra e të moshuar, u masakruan nga ushtria e policia serbe. Në përkujtim të kësaj masakre, qindra qytetarë kryen homazhe pranë përkujtimores, ndërkohë një prej vizitorëve më të veçantë që edhe nderuan 45 viktimat e kësaj masakre ishte edhe ish-ambasadori i OSBE në Kosovë, zëri i fortë kundër masakrave serbe, William Walker. Ai falënderoi qytetarët për rëndësinë dhe vlerësimin që i japin kësaj ngjarje, ndërkohë në homazhe ishin edhe liderë të opozitës. Kreu i Aleancës për Ardhmërinë e Kosovës, Ramush Haradinaj, u shpreh se e vërteta e Reçakut është e pandryshueshme, teksa kërkoi zbardhje të çdo krimi mbi shqiptarët.