164 persona të arrestuar, 354 nën hetim dhe 17 të tjerë në kërkim, ky është bilanci i operacioneve policore në 7 ditët e fundit në vendin tonë. Policia e shtetit ka publikuar të gjitha operacionet policore të kësaj jave, ku specifikon se janë kapur 36 persona të shpallur në kërkim, nga këta 31 në kërkim kombëtar dhe 5 në kërkim ndërkombëtar. Vetëm gjatë kësaj jave janë zhvilluar 24 operacione policore, ku 164 persona janë arrestuar për armë mbajtje pa leje, kultivim dhe shitje të lëndëve narkotike, krime mjedisore, për organizime të lojrave të fatit, dhunë në familje, për kundërshtim të forcave policore etj. Në harkun kohorë të 7 ditëve, janë pezulluar 404 leje drejtimi, janë arrestuar 78 drejtues mjetesh, janë goditur 8 raste të korrupsionit aktiv ndaj punonjësve të Policisë, janë sekuestruar 4 armë zjarri, municion luftarak, 8 armë të ftohta, 450 gramë kokainë, 73 kilogramë kanabis, rreth 1 milion euro të falsifikuara etj. Edhe pse policia e shtetit e ka rritur ritmin e kontrolleve dhe të ndëshkimit të qytetarëve për shkelje të ndryshme, bilanci i arrestimeve vijon të jetë I lartë.