Autoritetet panameze raportuan se kishin kapur 2.3 tonë droga, pa specifikuar se për cfarë substance bëhej fjalë, në tre operacione të kryera në brigjet në paqësor dhe karaibe. Një nga ngarkesat e kapura kishte si destinacion portin e Valencias, në Spanjë. Shërbimi kombëtar detar i Panamasë, në bashkëpunim me prokurorin e specializuar për krimet e lidhura me drogën, konfiskuan një total prej 2344 pakosh, me peshë 1 kg secila, në 48 orët e fundit, thanë zyrtarët. Sasia e parë e drogës u kap në Punta Mala, në provincën Los Santos në brigjet e paqësorit, ku një barkë e shpejtë me dy pjesëtrë ekuipazhi u gjurmua. Operacioni i dytë u krye në Colon, në karaibe, dhe sasia e drogës së kapur mendohet se ishte tranzit dhe kishte si destinacion portin spanjoll të Valencias. Ndërsa operacioni i tretë, po në Punta Mala, u regjistrua pasi një barkë u interceptua nga roja bregdetare dhe në largim e sipër hodhi 25 thasë me drogë në det. Sipas zyrtarëve panamezë rastet e kapjes së sasive të mëdha të drogës në vend po shtohen dhe ajo që bie në sy është se gjithnjë e më shumë po tentohen tregjet evropiane. Vitin e kaluar, autoritetet panameze konfiskuan një shifër rekord droge, prej 138.41 tonësh, nga e cila 108.82 tonë ishin kokainë. Panamaja përdoret si një urë për drogën e prodhuar në amerikën e jugut dhe që ka si destinacion kryesor SHBA, konsumatoren më të madhe të kokainës në botë, por edhe evropën.