Shqipëria nuk është pak të thuhet se e ka fituar betejën me pandeminë e covid 19. Prej shumë ditësh, vendi ynë jo vetëm ka regjistruar numër të ulët infektimesh dhe viktimash, por madje edhe ka mbyllur spitalet rajonale dhe dy të tjerë që ishin enkas për trajtimin e pacientëve me koronavirus. Rastet e 24 orëve të fundit janë të papërfillshme. Vetëm 2 infektime të reja dhe asnjë viktimë, duke bërë që lufta e më shumë se një viti të jetë e fituar. Kjo për disa arsye, mes të cilave edhe procesi i vaksinimit, që nisi në kohën e duhur dhe ndoshta në momentin më të pritshëm. Me këtë situatë Shqipëria gëzon të gjitha të drejtat për të pasur një sezon turistik totalisht të hapur dhe me lëvizje të lirë të turistëve vendas dhe të huajve që vijnë në Shqipëri. Por, nuk duhet harruar se vetëm një vit më parë Shqipëria, si shumë vende të tjera, ndoshta me bnumër të madh të popullsisë pati pasoja rrënqethëse. Sepse, çdo ditë kishte mijëra infektime dhe dhjetëra viktima. Statistikisht, për 15 muaj janë regjistruar 2451 humbje jete në total. Po në harkun kohor të 24 orëve janë kryer 3593 testime, ku vetëm 2 qytetarë kanë rezultuar pozitivë, një qytetar nga Tirana dhe një nga Lezha. Ndërkohë po në 24 orët e fundit janë në trajtim spitalor 28 pacientë, nga të cilët 5 prej tyre në terapi intensive. Aktualisht në Shqipëri janë ende 296 persona të infektuar me Covid-19.