Komisioni Europian kaloi në filtër të gjithë sektorët e Shqipërisë, duke filluar nga politika, ekonomia e deri tek drejtësia. Në 134 faqe progresraport, prezantuar nga komisioneri Oliver Varhelyi, Komisioni Europian evidentoi disa pika kyçe që e mbajnë Shqipërinë ende larg unionit europian. Korrupsioni mbetet një problem shqetësues dhe sipas monitorimeve të Komisionit Europian, sektori më i prekur nga rryshfetet është prona private. Në dokument thuhet se duhen bërë më shumë përpjekje për të konsoliduar të drejtën e pronës përmes regjistrimit dhe dixhitalizimit të të dhënave kadastrale. Skema e Pasaportave të Arta shihet me shqetësim nga evropianët pasi përmban rreziqe në lidhje me sigurinë, pastrimin e parave, evazionin fiskal, financimin e terrorizmit, korrupsionin dhe infiltrimin e krimit të organizuar. Brukseli kërkon që si një vend kandidat, Shqipëria të mos e miratojë këtë skemë.