Ekstrakti i parë i listës zgjedhore, tregon se të drejtën e votës në zgjedhjet e 11 majit të këtij viti e gëzojnë 3,721,116 shtetas, sipas të dhënave të gjendjes civile. Të dhënat u bënë publike nga ministri i brendshëm, Ervin Hoxha i cili ndër të tjera shpjegoi se 50.5 për qind e tyre janë meshkuj dhe 49.5 për qind janë femra. Të papërfshirë në këtë listë janë 4,536 shtetas të cilët janë mbi 100 vjeç dhe që duhet të paraqiten pranë zyrave të gjendjes civile për t’u përfshirë në listën e zgjedhësve. Krahasuar me të dhënat e zgjedhjeve parlamentare të vitit 2021, vihet re rritje e numrit të shtetasve me të drejtë vote. Në ekstraktin paraprak të listës zgjedhore të bërë publike në tetor të vitit 2020, rezultuan 3,608,003 shtetas, nga të dhënat paraprake të drejtorisë së përgjithshme të gjendjes civile; por në 25 prill 2021 rezultuan përfundimisht 3,588,869 zgjedhës.