Votat preferenciale sollën surpriza në renditjen individuale të kandidatëve për deputetë. Kandidati më i votuar në këto zgjedhje të përgjithshme është socialisti, Taulant Balla, kandidat në qarkun e Elbasanit, njëherazi edhe kryetar i grupit parlamentar të Partisë Socialiste. Pas Ballës, më i votuari është Fatmir Xhafaj, votat e të cilit bënë të mundur që të thyejë herësin dhe të klasifikohet në listë të sigurt në qarkun e Tiranës. Në vendin e tretë rendit kryedemokrati Lulzim Basha, i cili në vota preferenciale rendit më lart se kryeministri i vendit Edi Rama. Pas Ramës, zgjedhja më dominuese e qarkut të Tiranës është 27 vjeçari Ornaldo Rakipi, i cili edhe pse nuk ka pasur një njësi administrative të caktuar në Tiranës, ka mundur të fitojë numër rekord votash, për t’u pasuar nga kandidati i Partisë Socialiste, Erion Braçe. Në vend të 7 si më e votuara është ministrja e infrastrukturës dhe energjisë, Belinda Balluku, njëherazi dhe kanidatja grua më e votuar në Shqipëri. Agron Shehaj klasifikohet ndër demokratët më të votuar në këto zgjedhje parlamentare. Edhe pse bëri fushatë në njësinë administrative numër 5, e cila njihet si bastion socialist, Shehaj ka mundur të sigurojë numrin më të lartë të votave preferenciale në rradhët e demokratëve, pas kryetarit Lulzim Basha.