Drejtorit të Zyrës për Kosovën në Qeverinë e Serbisë, Petar Petkoviq, iu ndalua hyrja në Kosovë dhe pjesëmarrja në shugurimin e patriarkut Porfirije në Patriarkanën e Pejës, njoftoi të mërkurën kjo zyrë. “Bëhet fjalë për shkelje brutale të marrëveshjeve, si të asaj për lirinë e lëvizjes, ashtu edhe të marrëveshjes për vizitat zyrtare, e cila parashikon procedura të thjeshtuara për vizitën në Kosovë të kryenegociatorit në dialogun me Prishtinën”, thuhet në njoftim. Aty, po ashtu, theksohet se kjo është hera e dhjetë që Petkoviqit i ndalohet vizita. Sipas njoftimit, vizita është paralajmëruar siç duhet, duke respektuar të gjitha marrëveshjet e arritura. Përveç pjesëmarrjes në ceremoninë e shugurimit të patriarkut u tha se ishte planifikuar edhe një vizitë në manifestimin “Ditët e Moravisë” në fshatin Kufcë e Epërme të Komunës së Gjilanit. Në njoftim thuhet se për “shkeljen brutale të marrëveshjes, por edhe mohimin e lirive fetare” do të informohet Brukseli zyrtar, por edhe faktorët e tjerë ndërkombëtarë.