Teksa zyrtarë e ish-zyrtarë të lartë të akuzuar, por dhe ata që janë nën hetim, kanë nisur një sulm frontal ndaj SPAK, edhe njëherë tjetër qeveria amerikane e shikon prokurorinë e posaçme si institucionin e duhur, që po jep rezultat në luftën me korrupsionin. Gjatë vizitës së saj të hënën në Tiranë, Colleen Hyland, Drejtuese e Zyrës për Europën Jugore dhe Qendrore në Departamentin e Shtetit, u takua me kreun e SPAK, Altin Dumanin. Ajo përsëriti mbështetjen e plotë të Shteteve të Bashkuara për SPAK dhe institucionet e pavarura të Shqipërisë Gjatë konferencës Ekonomike për Ballkanin Perëndimor të mbajtur në Tiranë deklaroi se korrupsioni në Shqipëri duhet të mbahet nën kontroll. “Korrupsioni është një çështje e madhe. Një problem i madh jo vetëm në Ballkanin Perëndimor dhe Shqipëri por edhe në shumë vende. Nëse doni shtim të investimeve të huaja duhet të ndryshoni sjellje e trajtoni korrupsionin. Shqipëria ka bërë përparim të shkëlqyet për këtë falë edhe SPAKU-t, që ka bërë një punë të jashtëzakonshme dhe çfarë kam parë nga sondazhet ka fituar respektin e qytetarëve të vendit tuaj. Nëse do ta zhvilloni dhe ruani një institucion si SPAK që e ndihmon vendin të trajtojë çështjet e korrupsionit, do të dërgonit një sinjal shumë të fortë tek investitorët e huaj. Duhet të punoni fort me luftën ndaj korrupsionit e të arrini standartet për në BE”. Zyrtarja e DASH theksoi se çdo vend i rajonit duhet të fokusohet tek sipërmarrjet dhe investimet, duke shtuar se SHBA dhe BE do ta vijojnë mbështetjen. “Nuk mendoj se ka gjë më motivuese sesa sipërmarrësit dhe personat e biznesit që duan të investojnë në këtë rajon dhe duan të mbeten këtu me vende të mira pune. Ju keni nevojë të shihni shumë larg për të parë përfitimet e bashkëpunimit rajonal në qasjen drejt BE dhe SHBA janë absolutisht mbështetëse të kësaj”