Një zjarr i fuqishëm përfshiu mbrëmjen e së hënës një biznes në afërsi të urës mbi lumin Shkumbin, shumë pranë autostradës, në vendin e quajtur Qafa e Sokolit në Lushnje. Biznesi ishte një fabrikë përpunimi lëndësh drusore e specializuar në prodhimin e paletave. Nga zjarri i rënë fabrika është shkrumbuar totalisht. Në vendngjarje shkuan zjarrfikësit e Lushnjes, Rrogozhinës, Peqinit dhe Divjakës, të cilët kanë izoluar flakët e mëdha dhe nuk i kanë lejuar të përparojnë drejt lagjes së banuar që ndodhet ngjitur me biznesin. Nuk pati të lënduar, por vetëm dëme materiale ku pirgjet me dru janë djegur tërësisht dhe për shkak të flakëve gjigante për pak kohë u bllokua edhe qarkullimi. Paraprakisht mendohet për një shkëndijë elektrike për shkak të erërave të forta. Në zonë është ndërprerë energjia elektrike për të mos pasur probleme të mëtejshme. Gjatë mbrëmjes së djeshme, ku një pjesë e Shqipërisë u përball me stuhi të shoqëruara me breshër, u shfaqën edhe disa zjarre. Flakët u përhapën në Pyllin e Sodës në Vlorë dhe rrezikuan 10 banesa aty pranë, ndërsa në Durrës u desh ndërhyrja e zjarrëfikësve për të vënë nën kontroll një zjarr në stadiumin “Niko Dovana”.