Rusia lëshoi një numër të madh raketash balistike ndaj qyteteve ukrainase të mërkurën, në ditën e Krishtlindjes. Ministri ukrainas i Energjisë, German Galushenko, tha se objektivi i sulmit ishte sërish sistemi energjetik ukrainas. Ndërsa Presidenti i Ukrainës, Volodymyr Zelensky, i ka quajtur çnjerëzore sulmet në ditën e Krishtlindjes. “Çdo goditje masive ruse kërkon kohë për t’u përgatitur. Nuk është kurrë një vendim spontan. Është një zgjedhje që bëhet me vetëdije jo vetëm për objektivin, por edhe për kohën dhe datën. Putini zgjodhi me dashje Krishtlindjen për sulm. Çfarë mund të ishte më çnjerëzore se kjo? Objektivat ishin sektori ynë energjetik. Ata vazhdojnë të luftojnë për të lënë Ukrainën pa energji”, deklaroi Zelensky. Një numër i madh shpërthimesh kanë tronditur edhe Harkivin, qytetin e dytë më të madh të Ukrainës, duke lënë pas një të vrarë dhe disa të plagosur. Kompania më e madhe private energjetike e Ukrainës, DTEK, konfirmoi se Rusia ka shkaktuar dëme serioze në infrastrukturë dhe se afro 500 mijë familje kanë mbetur pa energji dhe pa ngrohje në temperatura që shkojnë -3 gradë celsius.