Kryetari i Lëvizjes “Shqipëria Bëhet”, Adriatik Lapaj duket se ka bërë një hap pas dhe i ka shtrirë dorën për dialog aleatit të tij në zgjedhjet e 11 majit, Endri Shabani, për t’u ulur në diskutime dhe për të zgjidhur ngërçin e krijuar mes tyre. Në një reagim zyrtar nga “Shqipëria Bëhet”, thuhet se janë në pritje të reflektimit dhe uljes për zgjidhje nga pala tjetër në Koalicion. “Ne e konsiderojmë këtë një moment që duhet tejkaluar si detyrë ndaj zgjedhësve tanë. Jemi në pritje të Z.Shabani dhe Z.Soko për ta adresuar me maturi e të vazhdojmë punën për zgjedhjet vendore”, thuhej në deklaratë. Por sërish theksin e vënë tek mos heqja dorë nga “besimi që gara e ndershme është rruga e vetme për të rikthyer besimin në demokraci, përtej çdo shantazhi e hileje, brenda e jashtë sistemit, ne do të qëndrojmë”.