Asociacioni i komunave me shumicë serbe pritet të jetë pjesë e marrëveshjes që duhet të arrihet brenda disa javësh mes Kosovës e Serbisë. Detaje të reja kanë dalë në dritë lidhur me ujdinë e përmendur dhe nga i dërguari i posacëm i SHBA-së për Ballkanin Perëndimor, Gabriel Escobar. SHBA-ja, ndonëse pret që kryeministri Albin Kurti dhe presidentja Vjosa Osmani ta zbatojnë shumë shpejt marrëveshjen për themelimin e Asociacionit, nuk do që ajo të bjerë ndesh me Kushtetutën e Kosovës. Nga BE-ja, nuk ka asnjë reagim. Dikur ish-Përfaqësuesja së Lartë e Bashkimit Europian për Politikën e Jashtme dhe Siguri, Federica Mogherini pati dhënë garanci se Asociacioni s’do të ketë kompetenca ekzekutive. Por nuk dihet nëse blloku do të vazhdojë t`i mbetet këtij qëndrimi. Escobari, që ishte të mërkurën në Kosovë, pohoi se me presidenten Vjosa Osmani kanë folur për mënyrat e ndryshme se si mund të formohet ky asociacion. Zyrtari i lartë amerikan u tregua i prerë se ai duhet të jetë në përputhje me Kushtetutën e Kosovës, ligjet e saj dhe të mos ndikojë në funksionimin e shtetit.