Pa kaluar 24 orë nga vrasja e një 19-vjeçari nga një bashkëmoshatar i tij në Vushtrri, qyteti u trondit edhe me një vrasje tjetër. Në fshatin Stanofc, në një nënkalim të këmbësorëve, një burrë i moshës 58 vjeçare vrau me armë zjarri një grua 42 vjeçare e më pas kreu edhe vetëvrasje. Policia e Kosovës në vendin e ngjarjes sekuestroi armën me të cilën dyshohet se është kryer vrasja, respektivisht vetëvrasja. Prokuroria Themelore e Mitrovicës në kuadër të hetimeve për zbardhjen e rrethanave që kanë çuar deri të krimi ka intervistuar edhe disa dëshmitarë okular të ngjarjes. Ndërkohë bëhet e ditur se viktima dhe bashkëshorti i saj kanë punuar së fundmi në një furrë që ishte në pronësi të dorasit. Sipas Rrahim Ajetit, familjar i viktimës, arsyeja që mund të ketë çuar deri të vrasja është largimi i saj nga puna. Kanë punuar para një kohë në furrë bashkë, nuk kanë pasur probleme. Sipas një informate jo fort zyrtare është xhelozia që, “pse ke shku tjetër vend me punu e ke lënë te unë” Me urdhër të prokurorit trupat e pajetë janë dërguar për obduksion në Institutin e Mjekësisë Ligjore.