Nuk ka asgjë më të pabesueshme sesa sulmet ndaj medias kur ajo guxon të prekë interesa korruptive dhe çështje të nxehta sikurse në plot raste ka bërë Top Channel. Në përmbushje të rolit të vet të natyrshëm si media kombëtare, Top Channel u qëndron besnik parimeve etike dhe profesionale në çdo rast, duke u mbështetur vetëm në fakte. I tillë ka qenë rasti edhe me investigimin për deputetin e PS Fatmir Xhafa, ish ministër dhe drejtues i lartë i kuvendit për drejtësinë, duke ekspozuar për publikun se si ai mbronte interesat korruptive të familjarëve të tij dhe ortakëve të tyre dhe se si poshtëronte zyrtarët e lartë të shtetit. Ky reagim i ish Ministrit të Brendshëm, Fatmir Xhafajt ndaj televizionit kombëtar Top Channel, pas 6 vitesh transmetimi të dokumentarit Inside Story, nuk është aq i rastësishëm. Dalja publike përkon me ambicjen e re politike të cilën Xhafaj e ka shpalosur kohët e fundit nëpërmjet një komisioni të posaçëm anti-korrupsion, që brenda radhëve të socialistëve shihet si një rikthim I ish Ministrit të Brendshëm. E për të arritur këtë, Xhafaj duhet të pastroj të shkuarën e tij, ku Inside Story ka një rol të pashmangshëm. Dokumentari, për të cilën Xhafaj i referohet me zhargonin e gjobëvënies, reflekton një mllef të mbartur, një argument shterp, një akuzë penale, përballë dhjetra fakteve të publikuara në dokumentarin e vitit 2018. Top Channel mund të anashkalonte një përgjigje për Fatmir Xhafajn, nëse do të fliste me etikë, pa fyerje, njësoj siç i shpjegonte publikut me brishtësi pafajësinë e të vëllait, për akuzën e trafikut të drogës. E meqënëse vitet kanë kaluar nga transmetimi i Inside Story, Top Channel ka vendosur të rikthejë edhe njëherë vëmendjen tek pikat kyçe, për të vlerësuar vetë opinioni mbi profesionalizmin gazetaresk. Për dokumentarin që Xhafaj e akuzon, do të ishte e udhës që të shpjegonte sesi është dhunuar Valbona Duka, kur ai ishte hetues në vitin 1985. Publiku kërkon transparencë nga Xhafaj, sesi ai është pronari faktik i një pallati 10-katësh në Pogradec, që ligjërisht është në emër të vëllait të bashkëshortes së tij notere. Ai është ndërtuar në vitin 2003, në të njëjtën kohë kur Xhafaj ishte deputet i këtij qyteti dhe bashkia drejtohej nga socialistët, një konfikt të hapur interesi. Fatmir Xhafaj nuk u pyet dhe as nuk foli në intervistën e Opinion, për tre kallëzimet ndaj tij, gjatë kohës kur ishte ministër në vitet 2004-2005, për abuzimin me fondet publike për ndërtimin e zyrave dhe një shkolle për riedukimin e të rinjve të burgosur. Dosjet e tij u mbyllën nga prokurori Vexhi Muçmata, që më vonë u shpërblye me postin e deputetit në Partinë Socialiste. Për akuza më të vogla se kaq, në kohën e sotme të SPAK, kolegët e Xhafajt janë pas hekurave. Në vitin 2005, kur ai ishte ministër, merret vendimi për ngritjen e burgut për të mitur në zonën elektorale të Xhafajt. Fondi ishte 47 milionë lekë por pas nënshkrimit të kontratës, firma paraqit një preventiv të ri ku merreshin përsipër vetëm 1/3 e punimeve me ato para. Përpara përbaltjes së Top Channel, Xhafaj duhet të sqaroj opinionin publik se cilat kanë qënë interesat e vëllait të tij në lojërat e fatit me dy vëllezërit Gramoz dhe Besnik Murataj. Këta dy të fundit dalin dhe në dosjen e trafikut të drogës, ku është i përfshirë dhe Agron Xhafaj. Si një nga hartuesit e reformës në drejtësi, Xhafaj mund të kursente sulmin ndaj Top Channel, dhe të shpjegonte sesi kishte shtuar një nen në Kodin e Procedurës Penale për të penguar ekstradimin e vëllait në Itali, një akuzë kjo e ngritur dhe nga zyrtarët e Partisë Demokratike. Inside Story në Top Channel ka investiguar sesi vëllai i tij i dytë, Alban Qazimi kishte marrë licencë për zyrë përmbarimore nëpërmjet influencës së Xhafajt, dhe sesi kishte monopolizuar tregun e përmbarimit. Gjatë kohës kur ishte Ministër, Xhafaj duhet ti sqarojë publikut sesi i vëllai i tij ka fituar tenderat me vlerë deri në 1.7 miliard lekë. Fatmir Xhafaj thekson se Inside Story kishte lidhje me krimin, por e vërteta është që ky dokumentar është i vetmi në Shqipëri që ka bërë investigime për bandat më të rrezikshme, përfshirë dhe atyre që bënin biznes me familjarët e Xhafajt. Ky editioral nuk është për të pastruar veten Top Channel, por për të ndihmuar Fatmir Xhafajn që të harrojë të shkuarën e tij, që siç thotë ai, e ka përndjekur në 22 vitet e fundit.