Ministria bjelloruse e Mbrojtjes bëri të ditur se mercenarët e grupit rus, Wagner po shërbejnë si instruktorë ushtarakë për forcat e mbrojtjes territoriale të Bjellorusisë. Ky njoftim vjen tri javë pasi Wagner kreu një rebelim të shkurtër në Rusi. Ministria tha se forcat bjelloruse po mësojnë aftësi përfshirë të shtëna taktike, lëvizjet në fushëbetejë, inxhinieri dhe mjekësi taktike. Wagner, që kishte luajtur rol kyç në luftën në Ukrainë, ka synuar që të rrëzojë udhëheqjen ushtarake ruse gjatë rebelimit jetëshkurtër, por më pas ata u tërhoqën. Yevgeny Prigozhin mësohet të këtë ndjekur nga afër stërvitjen e grupit që udhëheq. Rrjeti hetues bjellorus, Hajun, ka thënë se Prigozhin mund të ketë qëndruar një natë gjatë kësaj jave afër Asipoviçit, ku po mbahen stërvitjet, pasi një fotografi e tij në një kamp u publikua. Ministria e Mbrojtjes së Bjellorusisë ka publikuar një video ku shfaqen luftëtarët e Wagner-it duke trajnuar trupat bjelloruse. “Nuk ka dyshim që ata kanë përvojë nga e cila mund të përfitojë ushtria bjelloruse”, tha një ushtar bjellorus. Sipas marrëveshjes, që i dha fund rebelimit në Rusi në fund të qershorit, luftëtarët e Wagner-it që nuk morën pjesë në kryengritje, mund t’i bashkohen ushtrisë së rregullt ruse ose të shkojnë në Bjellorusi. Pamjet: AFP