Serbia ka paraqitur shtatë kërkesa për Kosovën në mënyrë që të vazhdohet me procesin e dialogut. "Kërkojmë të kthehemi te gjithçka që është arritur dhe përparuar në procesin e dialogut", tha Presidenti i Serbisë, Aleksandar Vuçiq, mbrëmjen e së premtes. Ai kërkon shpalljen dhe mbajtjen e “zgjedhjeve të lira dhe demokratike” në veri të Kosovës nga misioni i OSBE-së dhe nën mbikëqyrjen e Bashkimit Evropian. Kërkon, kthimin e serbëve në Policinë e Kosovës e në sistemin gjyqësor, largimin e Policisë së Kosovës nga veriu dhe tërheqjen e Policisë nga të gjitha institucionet që u mbyllën në 2024 e që sipas tij ofronin shërbime për qytetarët. Presidenti serb ka kërkuar formimin e Asociacionit të komunave me shumicë serbe, zbatimin e menjëhershëm të “garancive të Bashkimit Evropian dhe Shteteve të Bashkuara nga 28 dhjetori i vitit 2022, dhe lirimin e menjëhershëm të të gjithë të burgosurve politikë" të arrestuar nga Policia e Kosovës, dhe kryerjen e pagesave me shërbimeve postare me valutën serbë, dinarë. Ai ka thënë se Beogradi do të nisë një “fushatë diplomatike globale”, në mënyrë që të plotësohen këto kërkesa dhe se kjo është “parakusht të domosdoshëm për një përparim domethënës” në procesin e dialogut mes Kosovës dhe Serbisë. Në një dokument që u është shpërndarë mediave prezentë në deklarimin e presidentit të Serbisë po ashtu thuhet se Kuvendi i Serbisë do të miratojë një ligj brenda 45 ditëve për të "shpallur krahinën autonome të Kosovës si një zonë të mbrojtjes së veçantë sociale” dhe se në Rudnicë dhe Ribar pranë kufirit me Kosovën, do të hapen zyra ku serbët e veriut të Kosovës do të kenë qasje në shërbimet e mbrojtjes sociale dhe që ato do të ofrojnë shërbime vitale shtetërore dhe administrative për qytetarët. Masat e prezantuara Vuçiq tha se janë hartuar në koordinim me përfaqësuesit e serbëve prej Kosovës. Vuçiq ka folur edhe për paralajmërimet për ta shpallur zonën në pushtim veriun. “Nuk kemi marrë vendim për pushtimin. Ekspertët tanë ligjorë kanë qenë kundër”, ka thënë ai. Presidenti serb ka akuzuar kryeministrin e Kosovës, Albin Kurtin se "qëllimi kryesor politik ka largimin eliminimin e plotë të serbëve" në Kosovë. Deklarimi i Aleksandar Vuçiq, bashkë me kërkesat vjen tre ditë pas takimit të tij me emisarin e Bashkimit Evropian për dialogun, Miroslav Lajçak.