Gjykata e Lezhës liron nga burgu Redion Hysën, i arrestuar për vrasjen e ish-efektivit Xhulio Prela. Rreth një javë më parë, prokuroria kërkoi që Hysa të dënohet me 20 vite burg por trupa gjykuese vendosi ta shpallë të pafajshëm. Ndërsa Nikoll Sherniku, i cili u vetëdorëzua në polici është dënuar me 3 vite e 6 muaj burg për përkrahje të autorit të krimit. Redion Hysa bashkë me kushëririn e tij Sokol Hysa u arrestuan nga Policia e Lezhës me 28 dhjetor të vitit 2020, pasi kishin qëlluar me breshëri automatiku në drejtim të karburantit kamerat e të cilit kishin filmuar vrasjen e policit. Pas veprimeve hetimore ndaj dy te rinjve u ngritën akuzat e “Mbajtjes pa leje te armeve dhe municioneve” dhe “Kanosjes me arme”, ndërsa në cilësinë e provës materiale u sekuestruan 28 gëzhoja. Në depozitën e ujit mbi tarracën e shtëpisë se Redion Hysajt, policia gjeti pistoletën që ishte përdorur në ngjarjen ku mbeti i vrarë efektivi Xhulio Prela. Ekspertiza balistike, ka provuar shkencërisht se pistoleta që mbahej e fshehur në depozitën e ujit, ka kryer 3 qitje në fshatin Gajush të Lezhës, vend i cili u gjend i pajete, efektivi i policisë. Pavarësisht këtyre raportimeve paraprake, trupa gjykuese vendosi ta lërë të lirë Redion Hysën. 26-vjeçari Prela u ekzekutua në orët e para të mëngjesit të datës 5 dhjetor të 2020 me tre plumba teksa po kthehej nga Shkodra për në Tiranë. Personi që dyshohet ta ketë qëlluar Brilant Martinaj u ekzekutua në një atentat të trefishtë 17 korrikun e vitit 2022.