Sulmi i së dielës ng ai cili humbi jetën efektivi i POlicisë së Kosovës, Afrim Bunjaku e u plagos një tjetër polic, ngjalli një valë indinjate e reagimesh, në mesin e të cilave pati sakaq edhe falënderime për pjesëtarët e Policisë së Kosovës. Pikërisht për të treguar mirënjohje ndaj tyre, në ekranin gjigand që ngrihet mbi sheshin “Times Square” është shfaqur logoja e Policisë së Kosovës së bashku me atë të UÇK-së dhe FSK-së.“Faleminderit heronjve tanë, Policisë së Kosovës. Rroftë Kosova Republikë”, ishte mbishkrimi në foton ku shihej logoja e Policisë së Kosovës. Nisma e një shqiptari nga Mitrovica nuk përfundonte këtu, por vazhdonte dhe me një fotografi tjetër ku shihej logo e UÇK-së e shkruhej “Të vdesësh për atdhe është sikur të rilindësh përsëri – Afrim Bunjaku”. Presidentja e Kosovës, Vjosa Osmani, në mbështetje të Kushtetutës së Kosovës vendosi që kjo e sotmja të shpallet ditë zie në nderim të policit Bunjaku. Për efektivin e vrarë, edhe Ambasada e Kosovës në Emiratet e Bashkuara Arabe e uli në gjysmështizë flamurin e Kosovës e pohuar kjo nga ambasadori, Xhabir Hamiti. “Kosova sot mban zi për vrasjen e një polici, i cili u vra në krye të detyrës gjatë një sulmi terrorist të kryer nga grupet kriminale të Serbisë në komunën e Zveçanit të Kosovës. Ambasada e Kosovës në Emiratet e Bashkuara Arabe e ka ulur flamurin në gjysmështizë”, ka shkruar ai në platformën “X”.