Vijon për të ditën dytë me radhë situata kritike me zjarrin në pyllin e Pish Poros, në Vlorë. Situata u përkeqësua mbrëmjen e të martës, pasi flakët favorizohen nga era. Me dhjetëra forca zjarrfikëse, efektivë të ushtrisë, Emergjencat Civile dhe katër helikopterë, dy të Forcave të Armatosura dhe dy nga Emiratet e Bashkuara, vijojnë betejën me flakët, që të mos kapërcejnë krahun tjetër të hidrovorit, pasi ka dendësi pishash dhe ndërhyrja është shumë e vështirë. Autoritetet kanë lajmëruar të gjithë njerëzit, që kanë biznese në zonë, që të bëjnë kujdes, pasi flakët janë përhapur në një sipërfaqe të madhe pyjore, ndërkohë që shqetësim mbeten edhe boçet e pishave, të cilat shkëputen nga pemët dhe përhapin më shumë zjarrin. Ministria e Mbrojtjes njoftoi se zjarri i favorizuar nga intensiteti i erës ka marrë një shtrirje të madhe, duke zgjeruar perimetrin në gjatësi dhe gjerësi. Të gjitha forcat e emergjencave po punojnë për të penguar kalimin e vatrës së zjarrit në kanalin e hidrovorit.