Një 57-vjeçar nga Kosova u arrestua nga policia e Durrësit pasi vidhte targat e automjeteve të turistëve të huaj. Ai u zbulua pas disa denoncimeve të bëra në komisariatin e qytetit bregdetar nga ana e turistëve. Nga këqyrja e kamerave të sigurisë rreth zonës, hetuesit arritën të identifikojnë 57-vjeçeçarin kosovar nga Mitrovica dhe ta prangosin. Sipas uniformave blu, ai gjatë ditëve të fundit në zonën e plazhit, vodhi targat e 6 makinave në pronësi të disa të huajve nga Serbia, Moldavia, Mali Zi dhe Ukraina. Nga hetimet paraprake dyshohet se 57-vjeçari i vidhte targat për tua shitur më pas personave me precedent kriminal, me qëllim që t’I përdornin në krime të ndryshme. Ndërkohë hetuesit po vijojnë punën për identifikimin dhe kapjen e të gjithë personave të tjerë të përfshirë në këtë veprimtari të jashtëligjshme. Ndërkohë materialet i kaluan Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme.