Dhoma e Avokatisë së Shqipërisë ka vendosur të bojkotojë të gjitha proceset penale të kësaj jave, pas arrestimit të avokatit Ulian Barjami, me akuzën se ka kanosur për shkak të detyrës prokurorin Gjergj Ceka, pas një seance gjyqësore të tensionuar në Gjykatën e Elbasanit. Në vendimin e marrë të dielën, Dhoma e Avokatisë njofton bojkotin e proceseve në hetim dhe në gjykim, në të gjitha shkallët, përfshirë edhe proceset në Gjykatën Kushtetuese, deri më 25 tetor. Nga ky bojkot përjashtohen seancat që kanë si objekt caktimi, ndryshimi, zëvendësimi dhe shuarje të masave të sigurisë. Ndërkohë, lidhur me ngjarjen e ndodhur gjatë një seance gjyqësore në Elbasan, Top Chanell ka mundur të sigurojë audioregjistrimin e debatit mes prokurorit Gjergj Ceka dhe avokatit Ulian Barjami, audioregjistrim të cilin të dyja palët institucionale të përfshira e interpretojnë në favor të tyre.