Kryetari i Bashkisë së Tiranës, Erion Veliaj reagoi për sekuestrimin e telefonit të bashkëshortes së tij, Ajola Xoxa prej agjentëve të BKH-së. Nëpërmjet një postimi në rrjetet sociale, ai tha se mbështet hapat procedurale të kryera nga Prokurorinë e Posaçme në hetimin pasuror që po zhvillohet ndaj tij dhe familjarëve të tij. “Duke marrë shkas nga zhvillimet e ditës së sotme, hapat procedurale të kryera nga prokuroria e posaçme në lidhje me hetimin pasuror që po kryhet ndaj meje dhe familjarëve të mi, jo vetëm janë të mirëpritura, por edhe i mbështes në çdo hap. U bë një kohë e gjatë që hetimin dhe gjykimin tim e bëjnë opozitarët e zhytur në llumin e korrupsionit dhe të “ashtuquajturat media”, që luftojnë çdo zyrtar e funksionar publik që nuk bie prè e presioneve dhe shantazheve të tyre për përfitime të padrejta.” Kryetari i bashkisë shigjetoi opozitën duke thënë se po përpiqen të dëmtojnë imazhin e tij dhe të familjes së tij me përhapjen e informacioneve të pavërteta që sipas Veliajt minojnë edhe punën e institucioneve të drejtësisë. “Familjarët e mi dhe unë, si qytetar i këtij vendi, por njëkohësisht edhe në cilësinë e kryetarit të Bashkisë së Tiranës, do të jemi gjithmonë të hapur për çdo veprim dhe vendim të institucioneve të drejtësisë, por duke përbuzur njëkohësisht me neveri çdo të pavërtetë, që ka si qëllim dëmtimin e imazhit tim dhe familjarëve të mi, si dhe duke përhapur, mbi të gjitha, disinformacione edhe mbi vetë punën e këtyre institucioneve”. Në reagimin e tij Veliaj thotë gjithashtu se nuk bën pjesë në kastën e vjetër politike që ka shmangur llogaridhënien. “Unë nuk bëj pjesë në atë kastë të vjetër politike që, për shumë kohë, e vendosën veten mbi ligjin, mbi drejtësinë dhe mbi llogaridhënien institucionale. Të gjithë këta që i kanë borxhe drejtësisë, rrokin flamurin e përkrahjes së drejtësisë dhe e sulmojnë atë me çdo mjet tashmë që drejtësia ka filluar të veprojë mbi ta, duke thyer kështu tabunë shumë vjeçare të mosndëshkueshmërisë” Hetuesit e BKH ishin në banesën e Veliajt në orët e para të mëngjesit të së premtes ku sekuestruan telefonin e bashkëshortes, Ajola Xoxa, ndërsa kryebashkiaku i Tiranës gjendej në një vizitë zyrtare në Hamburg të Gjermanisë.