Colin Powell, i pari afrikano-amerikan i emëruar sekretar shteti në SHBA, ka ndërruar jetë në moshën 84 vjecare nga komplikacionet e Covid. Ish oficeri ushtarak u vendos në krye të diplomacisë së vendit të tij në vitin 2000, kur president i Shteteve të Bashkuara ishte George W Bush. "Ne humbëm një bashkëshort, një baba, një gjysh dhe një amerikan të mrekullueshëm dhe të dashur", thuhet në deklaratën e familjes së tij. Powell ka qenë një këshilltar ushtarak i besueshëm i një numri të madh të politikanëve kryesorë amerikanë. Ai patu shërbyer në luftën e Vietnamit, një përvojë kjo që më vonë e ndihmoi në përcaktimin e strategjive të tij ushtarake dhe politike. Ish shefi shtabi dhe ish gjeneral, Powell, që i shërbeu katër presidentëve, krijoi reputacionin e një njeriu të ndershëm, që i largohej sherreve politike e shihej si një aset në korridoret e pushtetit. Ai nuk arriti megjithatë ta kapërcente jehonën e fjalimit të vet shkurtin e viti 2003 në Këshillin e Sigurimit të OKB-së lidhur me ekzistencën e armëve të shkatërrimit në masë në Irak, ku provat që ai ofroi rezultuan më pas të pavërteta. “Ajo ishte një njollë, që do të mbetet gjithmonë pjesë e të dhënave të mia; ishte e dhimbshme atëherë e mbetet e dhimbshme edhe tani”, u shpreh ai në një intervistë për ABC në 2005-sën, ku rrëfeu pengun e vet të madh.