Pak ditë pas urdhrit të kryeministrit Edi Rama, ministri i Drejtësisë, Ulsi Manja, dërgon në Këshillin e Lartë të Prokurorisë dhe Inspektoratin e Lartë të Drejtësisë prokuroren e Shkodrës, Elsa Gjeli. Ministri Manja kërkon nisjen e procedimit disiplinor ndaj prokurores Gjeli për mosfillimin e hetimeve për ndërtimet pa leje në fshatin turistik të Thethit, që u denoncuan publikisht nga kryeministri Rama. “Prokurorja Gjeli vendosi mosfillimin e procedimit penal brenda 48 orëve nga regjistrimi i kallëzimit penal, pa kryer veprime hetimore ose verifikime në terren”. Në shkresën drejtuar institucioneve të drejtësisë, ministri shpjegon të gjitha rrethanat e rastit, që nga kontrolli i IMT të Bashkisë Shkodër më 29 prill, kallëzimi në Prokurori, referimi i materialeve në organin e akuzës, pezullimi i punimeve më 30 prill për vendosjen e kabinave, vendimi për prishjen dhe gjobën subjektit më 8 maj. “Në këtë rast që po ju paraqesim, vendimi i prokurorit është në kundërshtim me përmbushjen e rolit dhe të funksionit të tij, ka cenuar rregullat e ushtrimit të hetimit, në lidhje me kallëzimin e datës 28 maj 2025 të Komisariatit të Policisë Shkodër ndaj dhe duhet t'i nënshtrohet shqyrtimit të thelluar nga ana e Inspektorit të Lartë të Drejtësisë”.