Raporti për Urën e Ibrit: Ura ka strukturë stabile, të qëndrueshme dhe funskionale Pas testimeve për qëndrueshmërinë e Urës së Ibrit, kompania e kontraktuar ka konkluduar se ura ka stabilitet dhe është funskionale. Në raportin preliminar thuhet se “struktura e urës e trafikut rrugor mbi lumin Ibër në qytetin e Mitrovicës, ka një strukturë stabiile, të qëndrueshme dhe funskionale gjatë kohës së shfrytëzimit, pothuajse ashti si dhe është projektuar dhe ndërtuar, dhe si e tillë mund të përdoret për shfrytëzim pa asnjë kufizim në ngarkesë nga ato të parapara me projekt dhe ka kapacitet të mjaftueshëm edhe për ngarkesat projektuese sipas modelit të ngarkesave të parapara me standardin evropian”. Zëvendësministri i Infrastrukturës, Hysen Durmishi thotë se duhet të pritet edhe raporti final për funksionalitetin e urës. “Raporti që kemi pranuar sot është preliminar dhe pas të cilit do të presim edhe atë final për të pasur edhe rezultatet përfundimtare mbi funksionalitetin e urës së Ibrit sa i përket aspektit teknik”, ka shkruar ai. Qeveria e Kosovës është duke vazhduar me punën për rivitalizimin e Urës së Ibrit, derisa është të martën ka pasur kundërshtim nga ndërkombëtarët. Ambasadori i Shteteve të Bashkuara të Amerikës në Kosovë, Jeffrey Hovenier, në një intervistë për Radio Evropën e Lirë ka thënë se ka një rrezik real që lidhet me hapjen e urës në Mitrovicë në këtë kohë e që mund të ndikojë në sigurinë e ushtarëve të NATO-s, përfshirë ata amerikanë. Nga Bashkimi Evropian planifikojnë që çështjen e hapjes së Urës së Ibrit ta diskutojnë në takimin e radhës në Bruksel. “Hapja e urës është çështje e dialogut edhe pse Qeveria e Kosovës po vepron në të kundërtën. BE-ja planifikon ta vendosë statusin e urës në agjendën e takimit të ardhshëm të dialogut” Qeveria e Kosovës kundërshton diskutimin në Bruksel për këtë çështje, derisa ende nuk ka një datë të caktuar për hapjen e Urës së Ibrit e cila është e mbyllur për qarkullimin e automjeteve që nga paslufta.