Në Ukrainë, autoritetet antikorrupsion kanë zbuluar një skemë të gjerë mashtrimi me tenderë për dronë ushtarakë dhe pajisje për bllokimin e sinjaleve, të blera me çmime të fryra. Njoftimi vjen vetëm dy ditë pasi Parlamenti ukrainas riktheu pavarësinë e plotë të agjencive hetimore dhe prokuroriale, pas protestave të gjera kundër një ligji që synonte t’i vinte ato nën kontrollin e Prokurorit të Përgjithshëm. Në një deklaratë të përbashkët në rrjetet sociale, Byroja Kombëtare Antikorrupsion dhe Prokuroria Speciale Antikorrupsion (SAPO) njoftuan se kanë zbuluar një skemë të organizuar, ku përfituesit nënshkruanin kontrata shtetërore me kompani furnizuese, duke i mbifatur çmimet dhe duke marrë ryshfet deri në 30 për qind të vlerës së kontratës.