Kievi i ka propozuar Moskës një raund të ri bisedimesh për paqe javën e ardhshme. Deklaratën e bëri vetë Presidenti i Ukrainës, Volodymyr Zelensky, pas ngecjes së bisedimeve në fillim të qershorit. Dy raunde bisedimesh në Stamboll nuk kanë arritur të sjellin ndonjë përparim drejt një armëpushimi, por vetëm shkëmbime të të burgosurve në shkallë të gjerë dhe marrëveshje për kthimin e trupave të ushtarëve të vrarë. “Sekretari i Këshillit të Sigurisë Umerov raportoi gjithashtu se kishte propozuar takimin e radhës me palën ruse për javën e ardhshme” Zelensky gjithashtu përsëriti gatishmërinë e tij për të zhvilluar një takim ballë për ballë me Putinin. "Një takim në nivel udhëheqësish është i nevojshëm për të siguruar vërtet paqen - paqe të qëndrueshme" Në bisedimet e muajit të kaluar, Rusia përshkroi një listë kërkesash të ashpra, duke përfshirë thirrjet që Ukraina të lëshojë më shumë territor dhe të refuzojë të gjitha format e mbështetjes ushtarake perëndimore. Kievi i hodhi poshtë ato si të papranueshme dhe vuri në pikëpyetje qëllimin e negociatave të mëtejshme nëse Moska nuk ishte e gatshme të bënte lëshime. Së fundmi ka qënë presidenti I shba-ve Donald Trump që po shtyn Kremlinin të ulet në tryezë dialogu. Trump i dha Rusisë 50 ditë kohë për të arritur një marrëveshje paqeje ose në të kundërt do të përballej me sanksione. Trump u zotua gjithashtu të furnizojë Kievin me ndihmë të re ushtarake, të sponsorizuar nga aleatët e NATO-s, ndërsa qytetet e saj vuajnë nga sulmet ajrore gjithnjë e në rritje ruse. Sulmet ruse në Ukrainë morën tre jetë të tjera të shtunën.