Ende pa nisur mirë punën si kryetar i Parlamentit të Kosovës, Dimal Basha ka ngjallur polemika të mëdha. Një raport i vitit 2012, në të cilin ai rezulton si bashkëautor, ka nxitur reagime të shumta në vend. Në punimin me titullin: “Globalizmi në Ballkanin Perëndimor: Krimi transnacional, islami fundamentalist dhe aleancat e padrejta”, thuhej se “sipas rasteve të hetuara, fondet për UÇK-në erdhën nga shqiptarë të zakonshëm në diasporë, por edhe nga trafikantët e drogës që operonin në gjithë Europën Perëndimore dhe në Shtetet e Bashkuara”. Pas raportimene në media mbi punimin në fjalë, Basha reagoi duke mohuar të ketë shkruar ndonjëherë kundër Ushtrisë Çlirimtare të Kosovës. “Kontributi im në këtë punim është vetëm në Kapitullin 3, “i cili trajton depërtimin e Islamit fundamentalist në Evropën Juglindore, me fokus Kosovën. Këtu përfundon përgjegjësia ime lidhur me punimin në fjalë”, shkroi ai në Facebook. Megjithatë, nuk e la sqarimin e tij me kaq, por vendosi ta thellonte atë përmes një konference për shtyp..