Një ngjarje e rëndë ka ndodhur në zonën e Llogarasë, në Vlorë, ku një person u gjet i pajetë brenda një automjeti që ishte përfshirë nga flakët. Burime pranë grupit hetimor bëjnë me dije se brenda mjetit nuk janë konstatuar armë zjarri apo gëzhoja, elementë që do të mbështesnin pistën e një vrasjeje. Sipas të dhënave paraprake, pista që po hetohet është ajo e vetëvrasjes. Sipas njoftimit të policisë, bëhet fjalë për shtetasin Artjon Xhelo, 27 vjeç, lindur dhe banues në Berat. Sipas deklarimeve të familjarëve, ai rreth orës 11:00 ka dalë nga banesa e tij me automjetin në fjalë, pa bërë me dije destinacionin dhe nuk është kthyer më. Po sipas familjarëve, shtetasi vuante prej rreth tre vitesh nga ankthi dhe depresioni, për të cilat ishte në trajtim mjekësor. Nga verifikimi i kamerave të sigurisë në bizneset përreth rezulton se automjeti ka hyrë në zonën e Llogarasë pa persona të tjerë brenda. Policia vijon hetimet për sqarimin e plotë të rrethanave dhe dinamikës së ngjarjes