Presidenti i Shteteve të Bashkuara, Donald Trump, ka deklaruar se vendet anëtare të NATO-s duhet të veprojnë me vendosmëri kundër shkeljeve të hapësirës ajrore nga ana e Rusisë, duke theksuar se ato duhet të rrëzojnë çdo aeroplan apo dron rus që shkel kufijtë ajrorë të tyre. Deklarata e Trump u bë gjatë një konference për media në New York, ku ai u pyet në lidhje me qëndrimin e tij për një skenar të tillë. Në një përgjigje të shkurtër dhe të drejtpërdrejtë, ai tha: “Po”, duke dhënë një sinjal të qartë për një qëndrim më të ashpër ndaj provokimeve ajrore ruse. Në Asamblenë e Përgjithshme të Kombeve të Bashkuara, Trump zhvilloi gjithashtu një takim me presidentin ukrainas, Volodymyr Zelensky, ku ai shprehu mbështetje të fortë për përpjekjet e Ukrainës kundër ushtrisë ruse. Trump lavdëroi ushtrinë ukrainase për rezistencën dhe efikasitetin e saj në luftë, duke deklaruar se “Ushtria ukrainase po bën një punë të shkëlqyer në ndalimin e kësaj ushtrie të madhe. Sinqerisht, është e mahnitshme.”