Irani mund të mos ketë një shans të dytë për vulosjen e marrëveshjes bërthamore: Përmes një postimi në platformën e tij sociale, Truth Social, Donald Trump e paralajmëroi Republikën Islamike se rrezikon të përballet me sulme akoma edhe më brutale nga ana e shtetit hebre, nëse nuk pajtohet me ujdinë. "Dy muaj më parë i dhashë Iranit një ultimatum 60-ditor për të 'bërë një marrëveshje'. Ata duhet ta kishin bërë! Sot është dita e 61-të. Ua thashë qartë se cfarë duhet të bënin, por ata thjesht nuk ia dolën ta realizonin një gjë të tillë. Tani kanë ndoshta, një shans të dytë!", ishte mesazhi i shefit të Shtëpisë së Bardhë. Bisedimet mes SHBA-së dhe Iranit për një marrëveshje atomike ishin gati të hynin në raundin e tyre të gjashtë të dielën në Oman. Pas sulmeve të Izraelit, Teherani menjëherë akuzoi Ëashingtonin se po mbështet lëvizjet luftëndjellëse të shtetit hebre. SHBA-ja mohoi me forcë cdo përfshirje të saj në ofensivën izraelite, e cila pritet të vazhdojë. Sekretari amerikan i Shtetit, Marco Rubio, deklaroi se Izraeli ndërmori “veprim të njëanshëm kundër Iranit” dhe se Shtetet e Bashkuara nuk kanë gisht në të. Por ai sërish e paralajmëroi regjimin e ajatollahëve që të mos ndërmarrë veprime hakmarrese, e tha se Izraeli e kishte njoftuar Uashingtonin se besonte se sulmet ishin të nevojshme për vetëmbrojtje.