Presidenti amerikan Donald Trump nënshkroi marrëveshjen e paqes për Gazën në Sharm el-Sheikh të Egjiptit, duke i dhënë fund një konflikti 738-ditor që kishte tronditur rajonin dhe komunitetin ndërkombëtar. Pas nënshkrimit, Trump u bashkua në skenë me presidentin egjiptian Abdel Fatah al-Sisi, presidentin turk Rexhep Taip Erdoan dhe kryeministrin e Katarit, të cilët kishin luajtur një rol kyç në ndërmjetësimin e marrëveshjes. Salla shpërtheu në duartrokitje, ndërsa Trump deklaroi: “Kjo është një ditë e jashtëzakonshme për Lindjen e Mesme; u deshën tre mijë vjet për të arritur këtu.” Duke iu drejtuar liderëve të tjerë të pranishëm, presidenti amerikan theksoi se gjithë procesi do të jetë nën monitorim të rreptë. “Ajo që kemi arritur së bashku në këto ditë të fundit do të ndryshojë historinë dhe do të mbahet mend përgjithmonë. Por ne do ta shohim me kujdes gjithçka hap pas hapi. Rindërtimi i Gazës? Më besoni, është pjesa më e lehtë.” Një gazetar e pyeti më pas për një nga pikat më të ndjeshme të marrëveshjes: riarmatosjen e Hamasit si forcë policore në Gaza. Trump u përgjigj shkurtimisht: “Ne u dhamë atyre miratim që të veprojnë si polici vendore për një periudhë kohore. Është pjesë e marrëveshjes.” Ndërkohë, në Gaza, Hamasi përfundoi lirimin e 20 pengjeve izraelite që ishin ende gjallë pas armëpushimit, ndërsa katër trupa të pajetë u kthyen nga 28 të tillë që rezultonin të zhdukur. Nga ana tjetër, Izraeli liroi gati 2,000 të burgosur palestinezë, siç ishte rënë dakord në marrëveshje.