Pavarësisht akuzave kundër tij, ish-presidenti Donald Trump, vazhdon të sfidojë pritshmëritë, ndërsa kryeson listën e kandidatëve të tjerë që synojnë emërimin nga Partia Republikane, për zgjedhjet presidenciale të vitit 2024. Dy ditë më parë prokurori i posaçëm ngriti padi kundër ish-presidentit të Shteteve të Bashkuara, duke e akuzuar atë për përpjekje për të përmbysur rezultatin e zgjedhjeve presidenciale të vitit 2020, që rezultuan në protestën e dhunshme të përkrahësve të tij ndaj Kapitolit. Pikërisht këtë padi por edhe të tjera, ish-presidenti i ka shfrytëzuar për të fituar mbështetje në fushatën zgjedhore, duke pretenduar se akuzat janë të motivuara politikisht. “Këto janë aktakuza qesharake dhe gjithçka që ata po bëjnë është një ndërhyrje masive në zgjedhje. Këtë po bëjnë. Ata duan të dëmtojnë kandidatin kryesor”, thotë ish-presidenti Trump. Pas çdo aktakuzë të re, përkrahja për të mes votuesve republikanë është shtuar dhe ai kryeson me një epërsi dyshifrore në garën brenda Partisë Republikane.