Presidenti amerikan, Donald Trump, po përgatit një buxhet historik për ushtrinë e Shteteve të Bashkuara. Trump dhe Sekretari i tij i Mbrojtjes, Pete Hegseth, njoftuan synimin e tyre për të propozuar buxhetin e parë ushtarak prej 1 trilion dollarësh në historinë e SHBA. Gjatë një konference të përbashkët për shtyp me kryeministrin izraelit, Benjamin Netanyahu, Trump tha se buxheti i ardhshëm do të jetë "afër 1 trilion dollarë", duke theksuar se "ne duhet të ndërtojmë ushtrinë tonë, sepse ka shumë forca të errëta atje jashtë". Nga ana e tij, Sekretari i Mbrojtjes, Pete Hegseth, në një postim në ‘X’ të hënën mbrëma, konfirmoi këto plane, duke shkruar: "Së shpejti: buxheti i parë trilion dollarësh i Departamentit të Mbrojtjes. Ne do të përdorim çdo dollar të taksapaguesve me mençuri”. Propozimi Trump-Hegseth përfaqëson një rritje drastike mbi buxhetin e këtij viti prej 892 miliardë dollarë, të cilat mbulonin jo vetëm Pentagonin, por edhe zhvillimin e armëve bërthamore dhe programet e sigurisë në agjenci të tjera federale. Trump mund të mos ketë specifikuar nëse shuma prej një trilion dollarësh ka të bëjë ekskluzivisht me Pentagonin ose buxhetin e mbrojtjes kombëtare në tërësi (i cili përfshin edhe shërbime të tjera), por parashikimet janë që shpenzimet totale të mbrojtjes të kalojnë 900 miliardë dollarë në buxhetin e ri. Deklarata e tij, megjithatë, konfirmoi synimin për një rritje në shkallë historike. "Askush nuk ka parë ndonjëherë diçka të tillë më parë”, tha Trump, duke shtuar se “Ne jemi të kujdesshëm me koston, por ushtria është diçka që duhet ta rindërtojmë. Ne duhet të jemi të fortë."