Ish-presidenti i Kosovës, Hashim Thaçi po kryen një vizitë në Kosovë. Gjykata speciale ka pranuar arsyen e lejes së tij, për arsye humanitare, pasi babai i ish-zyrtarit të lartë raportohet të jetë në gjendje të rëndë shëndetësore. Sipas fotografive të siguruara nga mediat kosovare, një numër i konsiderueshëm forcash policore të bashkimit Evropian janë jashtë shtëpisë së ish-presidentit Hashim Thaçi, në Burojë të Skënderajt. Ende nuk ka detaje zyrtare se sa ditë do të qëndrojë ish-presidenti në Kosovë, ndërsa kjo është hera e dytë që atij i jepet leje për të vizituar familjarët. Në majin e këtij viti, Thaçit iu mundësua vizita në Kosovë për shkak të gjendjes së rënduar të nënës së tij. Më herët në Kosovë ka qenë edhe zyrtari tjetër i lartë Kadri Veseli, që mbahet në paraburgim. Ai gjithashtu vizitoi nënë e tij të sëmurë. Po bëhen tashmë tre vite që katër ish-drejtues të lartë të UCCK-së dhe bashkëluftëtarë të tjerë mbahen në paraburgim në Hagë, për gjyqin që po zhvillohet ndaj tyre për shkak të akuzave për krime lufte dhe ndaj njerëzimit gjatë viteve 98 – 99. Gjyqi nisi më 3 prill, ndërsa deri më tani janë marrë në pyetje disa dëshmitarë.