Vazhdon për të tretën ditë me radhë zjarri gjigand që ka përfshirë rafinerinë e rajonit rus të Rostovit, ku po digjet nafta e ushtrisë ruse. Ekipet e zjarrfikësve nuk kanë mundur t`i vënë flakët nën kontroll, pavarësisht përpjekjeve të shumta. Tashmë, sipas zyrtarëve lokalë,zjarri në rafinerinë e naftës në Proletarsk, është përhapur në një zonë prej 10 mijë metrash katrorë. Rreth 22 rezervuarë nga 74 sa janë të mbushur me naftë, vazhdojnë te digjen. Gjithsej 520 persona, përfshirë zjarrfikës nga qytetet e tjera fqinje, i janë bashkuar tentativave për ta vënë zjarrin nën kontroll. Rusët pretendojnë se flakët në rafinerinë në Proletarsk shpërthyen për shkak të tre dronëve të Ukrainës. Autoritetet e sigurisë atje janë vënë në gjendje gatishmërie, teksa është shpallur gjendja e emergjencës. Ukraina vazhdon të çojë përpara ofensivën e saj në rajonin kufitar rus, Kursk dhe tani kontrollon qindra kilometra katrorë të territorit, por thotë se me veprimet e saj synon të krijojë një zonë neutrale dhe jo të pushtojë toka ruse.Presidenti ukrainas, Volodymyr Zelensky, ka thënë më 19 gusht se forcat ukrainase kanë marrë kontrollin e 92 vendbanimeve në rajonin Kursk të Rusisë dhe tani kontrollojnë më shumë se 1.250 kilometra katrorë të territorit të armikut, në vetëm dy javë prej nisjes së inkursionit të befasishëm në anën tjetër të kufirit.