Në Teksass vazhdojnë kërkimet për 27 vajza të zhdukura pas përmbytjeve shkatërruese që kanë marrë jetën e të paktën 50 personave. Shirat e rrëmbyeshëm nisën të premten, duke përmbytur zona të gjera në qendër të shtetit. Lumi Guadalupe u rrit me 8 metra për vetëm 45 minuta, duke shkaktuar dëme të mëdha në kampin veror Camp Mystic në Kerr County, ku ndodheshin rreth 750 vajza. Dritaret e kabinave u thyen nga fuqia e ujit, ndërsa sende personale si batanije dhe lodra fëmijësh u gjetën të mbuluara me baltë. Sherifi i zonës, Larry Leitha, konfirmoi se janë gjetur 43 trupa vetëm në Kerr County – 28 të rritur dhe 15 fëmijë. Viktima të tjera janë regjistruar edhe në qarqet përreth duke e çuar numrin e përgjithshëm në 50.