Rreth 100 persona u lënduan dhe disa ndërtesa u dëmtuan pas tërmetit të fuqishëm të regjistruar këtë mëngjes në pjesën lindore të Turqisë, me epiqendër në Malatya. Tërmeti me magnitudë 5.9 i shkallës rihter, u pasua nga 77 pasgoditje në rajon duke shkaktuar panik tek qytetarët të cilët nxituan të dilnin në rrugë. Sipas të dhënave nga qendra Sizmologjike Evropiane-Mesdhetare, thellësia e tërmetit ishte 10 kilometra. Ministri turk i Punëve të Brendshme tha se ekipet e kërkim- shpëtimit ndodhen në terren për tu ardhur në ndihmë qytetarëve në nevojë dhe për evidentimin e dëmeve. Në të gjitha shkollat në Malatya u ndërpre procesi mësimor dhe fëmijët u nxorën jashtë godinave për të parandaluar çdo rrezik. Shembje të pjesshme të ndërtesave janë konstatuar në 3 provinca, ndërsa brenda pak minutave, qendra e emergjencës pati 1112 njoftime e kërkesa për ndihmë, duke përfshirë edhe raportime për qytetarë që u hodhën nga ballkonet në gjendje paniku.