Presidenti rus, Vladimir Putin, tha se do të hakmerret ndaj kujtdo që tenton të përçajë shoqërinë ruse, teksa përgëzoi efikasitetin dhe besnikërinë e agjencive të zbatimit të ligjit të shtetit të tij. Putin ka përshkallëzuar shtypjen e shoqërisë civile, mediave të pavarura dhe opozitës, teksa po vazhdon ofensivën e tij ushtarake në Ukrainë. Kundërshtarët dhe kritikët e Kremlinit ndiqen penalisht dhe dënohen me burgime të gjata. “Ata që përpiqen të frikësojnë njerëzit, të përçajnë shoqërinë tonë, të luajnë me ndjenjat fetare apo kombëtare, nuk do të kenë kurrë sukses. Ata i pret një hakmarrje e pashmangshme”, tha Putin përmes një video-mesazhi të publikuar nga Kremlini. Rusia rregullisht përdorë shprehje sikurse “spiunë perëndimorë” dhe “kukulla të Perëndimit” për të përshkruar ata që kundërshtojnë Kremlinin, përfshirë kritikët në vend. Kremlini publikoi këtë video të Putinit për të shënuar “Ditën e hetuesve” dhe lideri rus nderoi agjenci të ndryshme të zbatimit të ligjit, përfshirë Komitetin Hetues dhe shërbimin e sigurisë. Kritikët e Kremlinit thonë se fokusi i Rusisë në hetimin dhe ndjekjen penale të kundërshtarëve politikë brenda vendit e bën shtetin të pambrojtur nga kërcënimet reale të sigurisë. Pamjet: AFP