Tensioni i krijuar mes presidentit amerikan Donald Trump dhe biznesmenit Elon Musk, ka shkaktuar reagime tallje tek zyrtarët e Moskës, raportoi të premten Reuters. Një zyrtar i lartë rus është ofruar si negociator bisedimesh për paqen mes presidentit amerikan dhe njeriut më të pasur në botë, ndërsa një tjetër tha se Musk duhet t’i dërgojë bizneset e tij në Rusi. "Elon, mos u mërzit! Nëse hasni probleme të pakapërcyeshme në SHBA, ejani te ne. Këtu do të gjeni shokë të besueshëm dhe liri të plotë të kreativitetit teknik”, shkroi në platformën “X” senatori nacionalist Dmitry Rogozin, i cili dikur drejtonte programin hapësinor të Rusisë. Ish-presidenti Dmitry Medvedev, që tani është zyrtar i lartë i sigurisë shprehu gatishmërinë për ta lehtësuar dialogun për arritjen e një marrëveshjeje të paqes midis palëve. "Jemi të gatshëm të lehtësojmë përfundimin e një marrëveshjeje paqeje midis D dhe E kundrejt një tarife të arsyeshme dhe të pranojmë aksionet e Starlinkut si pagesë. Mos u grindni, djema", ka shkruar ai. “Nuk mendoj se Musk do të ketë nevojë për azil politik, por nëse kjo do të ndodhë, ai e ka derën të hapur në Rusi”, shkroi Dmitry Novikov, zv.presidenti i Komisionit për punët e jashtme në Rusi. Zëdhënësi i Kremlinit, Dmitry Peskov, kur u pyet për përplasjen, tha se është një çështje e brendshme e SHBA-së, megjithëse qe i bindur se Trumpi do ta trajtonte me kujdes atë. Mbrëmjen e së premtes Trump deklaroi sërish se “Musk është çmendur fare” dhe se i kishte kërkuar të flisnin, por ai nuk kishte interes. Shefi i Teslas humbi 33 miliardë dollarë vetëm në një ditë nga rëniet në bursë.