Lëvizja Vetëvendosje vijoi fushatën në Skenderaj të hënën, por kryetari i saj, Albin Kurti, u prit me brohoritje të ndryshme, pasi pati edhe thirrje “Thaçi – Thaçi” dhe “Albin hajni”, ndërsa pranë tubimit u mblodhën dhjetëra qytetarë që ishin kundër tij dhe policia ndërhyri për t'i larguar. Në vendin ku ishte përcaktuar të zhvillohej mitingu elektoral Kryeministri Albin Kurti u paraqit i rrethuar nga truprojat, të cilët mbanin edhe çadrat mbrojtëse. E kur tubimi nisi, u ndërpre për disa minuta edhe energjia elektrike, e kësisoj u ndërprenë edhe fjalimet hyrëse. Turmës së qytetarëve që kundërshtonin Kurtin, policia e Kosovës iu përgjigj me hedhjen e sprejit dhe u mundua të izolohej e njëjta. Tubimi u zhvillua, por vazhdimisht ndaj pjesëmarrësve hidheshin mjete piroteknike. Sapo përfundoi mitingu, qytetarët nga të dyja anët u shpërndanë. Ministri i Kulturës, Hajrulla Çeku, i ka quajtur “qyqarë të orkestruar” të pranishmit që tentuan të pengonin tubimin e Vetëvendosjes. “Disa qyqarë të orkestruar nga partia paskan tentuar të pengojnë tubimin e Vetëvendosjes në Skenderaj. Për çudi, komuna paralele e Serbisë atje nuk ju bënte fort përshtypje, Harroni që na ndalni”, ka shkruar ai në Facebook. Lëvizja Vetëvendosje ka vazhduar tubimin në Drenas, ku pranë sallës u panë sërish forca të shtuara të Policisë.