Në Pallatin e Brigadave u zhvillua një takim maratonë mes Kryeministrit Edi Rama dhe ministrave të qeverisë. Burime nga kjo mbledhje zbuluan për Top Channel, se çdo ministër ka paraqitur raportin e punës deri më tani dhe ka përcaktuar objektivat për periudhën deri në përfundimin e mandatit të tretë qeverisës. Takimi ka zgjatur rreth 6 orë dhe ka përfshirë diskutime të thelluara për përgatitjen e programit elektoral të Partisë Socialiste në çdo sektor, si dhe për qasjen që do të ketë partia në takimet publike me qytetarët. Pjesë e rëndësishme e diskutimeve ka qenë gjithashtu përcaktimi i strategjisë për të përballuar sfidat e zgjedhjeve të 11 majit. Për ditën e dytë, të shtunën, takimi pritet të jetë më interesant, pasi diskutimet do të fokusohet në kristalizimin e skuadrës me kandidatët për deputetë, të cilët do të përfaqësojnë Partinë Socialiste në zgjedhjet parlamentare. Lista e kandidatëve për 12 qarqet e Shqipërisë duhet të dorëzohet në Komisionin Qendror të Zgjedhjeve brenda datës 12 Mars. Një tjetër çështje e rëndësishme do të jetë gjithashtu vota e diasporës, dhe pritet të jetë një sfidë e madhe për PS-në në këtë proces zgjedhor.