Izraeli bombardoi të martën qendrën e qytetit të Gazës si dhe zgjeroi në 360 mijë numrin e rezervistëve të angazhuar në luftime, duke u zotuar se do të hakmerret ndaj grupit militant Hamas, por banorët e veriut të Izraelit flasin për një situatë të rëndë dhe frikë për sulme të tjera nga grupi militant libanez Hezbollah. Yaakov Regev është një banor izraelit që jeton në kufi me Libanin dhe thotë se ai dhe qytetarët e tjerë ndjehen të pasigurt jo vetëm nga sulmet e papritura të Hamas në Gaza, por edhe nga sulme të mundshme që vijnë nga grupi militant i Libanit. “Siç po e shihni, gjërat janë të tensionuara këtu, atmosfera është e keqe, është si një gjendje lufte. Nuk duam të ikim nga ky vend, ky është vendi ynë, toka jonë, nuk kemi ku tjetër të shkojmë. Ky është i vetmi shtet hebre në botë. Të gjitha këto bëhen se ne jemi hebrenj. Ku mund të shkojmë? Në cilin vend? Ata që jetojnë në Gaza kanë ku të shkojnë, ata kanë Jordaninë, Egjiptin...", thotë banori. Izraeli sakaq ka paralajmëruar se do të nisë fushatën e quajtur prej tyre si “Shpatat e Hekurit” dhe ka grumbulluar tanke dhe mjete ushtarake të blinduara si pranë Gazës ashtu edhe në kufirin verior me Libanin. Pamjet: AFP