Pas sulmit në veri të Kosovës ku mbeti i vrarë polici Afrim Bunjaku, një pjesë e partive opozitare në Parlamentin serb kanë akuzuar presidentin serb Aleksandar Vuçiç dhe partinë e tij Progresive Serbe, për autorësinë e ngjarjes së rëndë. Radio Europa e Lirë, teksa citon agjencinë Beta, raporton se presidenti i partisë opozitare serbe, Lëvizja Kombëtare e Serbisë, Mirosllav Aleksiç, deklaroi se Vuçiç dhe nënkryetari i Listës Serbe, Millan Radoiçiç janë përgjegjësit kryesorë për gjakderdhjen në Banjskë të Zveçanit. “Pas konfliktit të armatosur në Banjskë, në të cilën vdiqën të paktën katër persona, Vuçiç duhet të japë dorëheqje. Radoiçiç nuk ka mundur të armatosë dhjetëra serbë në veri pa dijeninë dhe miratimin e presidentit serb dhe shërbimeve serbe të sigurisë. Këta të dy kanë më së shumti përgjegjësi për gjakun e derdhur në Banjskë”, tha Aleksiç. Të njëjtin qëndrim ka mbajtur edhe deputeti opozitar nga Partia pro-Evropiane Demokratike, Sërxhan Milivojeviç, i cili u shpreh se Vuçiç duhet të japë dorëheqjen, sepse në luftën njëditore të tij ndaj kryeministrit të Kosovës, Albin Kurti, lideri serb sakrifikoi serbët e rinj në Kosovë. Duke komentuar akuzat e Sveçlës se Radoiçiç udhëhoqi 30 serbë që sulmuan Policinë në Banjskë, deputeti tha se pjesëmarrja e personit të shpallur non grata nga SHBA-ja në këtë ngjarje tragjike nuk do të ishte befasi. Nëse pjesëmarrja e Millan Radoiçiç në sulmin e së dielës ndaj Policisë së Kosovës do të konfirmohet atëherë sipas tij kjo do ta vërtetonte më së miri se presidenti serb qëndron pas këtij veprimi.