Pas disa ditë përleshjesh, në Siri u njoftua arritja e një armëpushimi mes zyrtarëve qeveritarë dhe udhëheqësve të fiseve druze. Ndërhyrja ndaj këtyre të fundit nxiti sulme ushtarake nga ana e Izraelit. Korespondentët e huaj thonë se forcat qeveritare siriane kanë nisur tërheqjen nga qyteti Suveida, edhe pse nuk është e sigurt nëse armëpushimi do të respektohet.Ndërkohë, bombardimet e shtetit hebre kanë vazhduar edhe pas shpalljes së pushimzjarrit. Druzët, degë e Islamit shiit, janë një pakicë etno-fetare që flet arabisht dhe jeton në Siri, Liban, Izrael dhe Lartësitë e pushtuara të Golanit. Rreth gjysma e ndjekësve të këtij besimi - me gjithsej afro një milion pjesëtarë - jetojnë në Siri, ku përbëjnë rreth 3% të popullsisë. Në Izrael, ky komunitet konsiderohet në masë të madhe si besnik ndaj shtetit, për shkak të pjesëmarrjes së pjesëtarëve të tij në shërbimin ushtarak. Sipas Byrosë Qendrore të Statistikave të Izraelit, rreth 152.000 druzë jetojnë në Izrael dhe në Lartësitë Golan - të pushtuara nga shteti hebre. Që nga rrëzimi i regjimit të Bashar al-Assadit në dhjetor, druzët u kanë rezistuar përpjekjeve të autoriteteve të reja për të vendosur autoritetin në jug të Sirisë. Shumë prej tyre kundërshtojnë praninë e forcave zyrtare të sigurisë në Suveida dhe nuk pranojnë të bashkohen me ushtrinë siriane. Arsyeja përse Izraeli po sulmon tani Sirinë për t’i penguar forcat e Damaskut që të ushtrojnë kontroll ushtarak në jug të vendit, pikërisht pranë kufirit me Izraelin i cili nuk do që në këtë zonë të ketë ushtri.