Një sulm i rëndë ka ndodhur në një spital në Gaza, ku Ministria e Shëndetësisë vendase raportoi se kanë humbur jetën të paktën 500 civilë. Pretendohet se bombardimet kanë ndodhur nga Ushtria e Izraelit, e cila ende nuk ka reaguar për situatën e rëndë, madje asnjëra nga palët nuk ka bërë një bilanc përfundimtar zyrtar. Spitali al-Ahli është i shkatërruar nga bombardimet, ndërsa ambulancat transportojnë pacientët në qendra të tjera shëndetësore. Pas situatës së rënduar Presidenti i Autoritetit Palestinez, Mahmoud Abbas, ka anuluar një takim të planifikuar me presidentin e Shteteve të Bashkuara, Joe Biden. Organizata Botërore e Shëndetësisë e dënoi sulmin ndaj spitalit në jug të Rripit të Gazës, si dhe kërkoi mbrojtjen e menjëhershme të civilëve dhe kujdesit shëndetësor në enklavën palestineze. "Ne e dënojmë fuqishëm sulmin ndaj Spitalit Al-Ahli Arab", tha drejtori i organizatës së OKB-së në një reagim në rrjetin social X. Shumë spitale në Qytetin Gaza janë shndërruar në kampe refugjatësh për qindra njerëz, të cilët shpresojnë se Izraeli do t’i kursejë nga bombardimet, pasi i kishte urdhëruar të gjithë banorët e këtij qyteti dhe zonave përreth të largoheshin në drejtim të pjesës jugore të Rripit të Gazës. Bazuar në statistikat e bëra numri i palestinezëve të vrarë nga sulmet e Izraelit në Rripin e Gazës ka arritur të paktën 2,750 civilë.