Familja Sula që zotëron një vresht në luginën e Drinos pranë fshatit Valare në Gjirokastër është mes atyre familjeve që u kthyen në Shqipëri pas një emigracioni të gjatë në Greqi. Përgjatë 10 viteve të fundit ata ja kanë dalë me angazhimin e të gjithë anëtarëve të familjes të zhvillojnë fermën dhe të sjellin një model sesi jetohet në harmoni me natyrën. Marsel Sula: Ne kemi qenë në emigracion si shumë shqiptarë të tjerë dhe jemi kthyer e kemi investuar në Shqipëri. Patjetër që nuk është e lehtë duhet punë e sidomos në bujqësi e blegtori që duhet punë nga mëngjesi në darkë. Është e përkushtuar e gjithë familja dhe situata tani është më e mirë se në fillim. Çfarë të mban ty Marsel këtu? Marsel Sula: E para është dashuria për vendin tim. E kemi të kultivuar brez pas brezi nga babai nga gjyshërit nga stërgjyshërit.” Në vreshtin e tyre buzë lumit Drino ditët me diell edhe në dimër janë të shumta. Të gjithë tani po përgatiten për punët e pranverës me krasitje, sistemime e modelim të mjedisit. Për Mitatin që vendosi të marrë familjen e të kthehet në vendlindje në një periudhë shumë të vështirë shpresa se do t’ia dilnin ishte motivi kryesor. Mitat Sula: Vështirësitë ishin të shumta dhe ka ende shumë. E para duhej të blinim tokën pronën, duheshin para që të bëhej investimi, kushtet për vaditjen, ngritjen e frutikulturës dhe vitikulturës. Këto kishin shkallë të lartë vështirësie. U detyruam të bëjmë një pus për vaditje. Që nga 2002 e deri tani ka ecur mirë. Krenaria jonë nis me atë që familja dikur nisi nga zero dhe tani jemi krenarë të besojmë tek djersa e puna jonë. Në Gjirokastër përgjatë Dronos një prej degëve kryesore të Vjosës janë funksionale të paktën 20 bujtina rurale me natyrë të ngjashme. Megjithëse ende të pasuportuara me programe kualifikimi apo mbështetje të tjera banorët ja kanë dalë ti shtojnë vlerën e turizmit të ngadaltë dhe miqësor me mjedisin ofertës turistike të destinacionit.